පොලිස්පතිට ලිපියක්

ශ්‍රී ලංකා වෘත්තීය පත්‍රකලාවේදීන්ගේ සංගමය (SLWJA)
මාධ්‍යසේවක වෘත්තීය සමිති සම්මේලනය (FMETU)
ශ්‍රී ලංකා මුස්ලිම් ජනමාධ්‍යවේදීන්ගේ සංසදය (SLMMF)
ශ්‍රී ලංකා දෙමළ ජනමාධ්‍යවේදීන්ගේ සන්ධානය (SLTJA)
නිදහස් මාධ්‍ය ව්‍යාපාරය (FMM)  
 
පොලිස්පති තුමා,
පොලිස් මූලස්ථානය,
කොළඹ – 01
 
ජනමාධ්‍යවේදීන් මුහුණ දී සිටින දුෂ්කරතාවයන් පිළිබඳව දැන්වීම
 
පොලිස්පතිතුමනි,
 
ශ්‍රී ලංකාවේ මාධ්‍ය ක්‍ෂේත්‍රයේ සේවයේ නියුතු ඡායාරූප මාධ්‍යවේදීන් වත්මන් තත්ත්වය තුළ තම කටයුතු කරගෙන යාමේදී මුහුණ දී සිටින දුෂ්කරතාවක් රැසක් පිළිබඳව ඔබගේ අවධානය යොමු කර වීමට  කැමැත්තෙමු.  වත්මන් තත්ත්වය තුළ මහජන ආරක්ෂාව පිළිබඳව නිසි සැළකිල්ල දක්වන අතරම ප්‍රජාතන්ත්‍රවාදී සමාජයක ජනමාධ්‍යවේදීන් සතු අයිතීන් උල්ලංඝනය විමට ඉඩ නොතැබිය යුතු බව අපේ විශ්වාසය යි.
 
පෙබරවාරි 12 වනදා කොළඹ ඉසිපතන විදුහල අසල ඡායාරූප ගැනීමක යෙදුණු ඇසෝෂියේටඩ් ප්‍රේස් ජාත්‍යන්තර ප්‍රවෘත්ති සේවයට අනුබද්ධව කටයුතු කරන ඡායාරූප ශිල්පී ගැමුණු අමරසිංහ මහතාට බාධා කළ සිවිල් ආරක්ෂක කම්ටුවේ පිරිසක් ඔහු ඡායාරූප ගැනීමෙන් වළක්වා පොලිස් නිලධාරීන් වෙත භාරදී තිබේ. කොළඹ නාරහේන්පිට පොලීසිය වෙත කැඳවාගෙන යනු ලැබූ අමරසිංහ මහතා නිදහස් කර ගැනීමට මාධ්‍ය සංවිධාන වල නායකයන් සහ ඡායාරූප මාධ්‍යවේදීන්ගේ සංගම් වල නියෝජිතයන් කිහිප දෙනෙකුට මැදිහත් වීමට සිදු විය. අමරසිංහ මහතා පැය දෙකක පමණ කාලයක් නිකරුණේ පොලීසියේ රඳවා තබා ගැණිනි.
 
පසුගිය ජනවාරි 23 දා රත්මලාන ජල සම්පාදන මණ්ඩලයේ ප්‍රධාන කාර්යාලය අබියස දී වීඩියෝ කැමරාගත කිරීමක නියුක්තව සිටි ‛දෙරණ’ රූපවාහිනී සේවයේ මාධ්‍යවේදියකු වන ඉන්දික ශ්‍රී අරවින්ද මහතා වට කරගත් සිවිල් ආරක්ෂක කම්ටුවේ පිරිසක් ඒ මහතාගේ කටයුතුවලට බාධා කරමින්, ඒ මහතාට තර්ජනය කිරීමේ සිද්ධියක්  ද සිදු වී තිබේ. පසුව එහි පැමිණි පොලිස් නිලධාරීන් විසින් අරවින්ද මහතා ගල්කිස්ස පොලිස් ස්ථානයට කැඳවා ගෙන යනු ලැබූ බවත් එහිදී එම පොලිසියේ කාර්ය භාර ප්‍රධානියකු ඒ මහතාට අවිනීත ලෙස කථා කළ බවත් අරවින්ද මහතා අප වෙත දන්වා තිබේ. පැය දෙකකට අධික කාලයක් නිකරුණේ පොලීසියෙහි රඳවා තබාගන්නා ලද ඔහු පසුව නිදහස් කරනු ලැබ ඇත්තේ ඔහුට එරෙහිව චෝදනාවක් නැති බව කියමිනි.
 
මෙම සිද්ධීන් දෙකේ දීම මාධ්‍යවේදීන් තම අනන්‍යතාවත්, ප්‍රවෘත්ති අධ්‍යක්‍ෂ වරයාගේ අත්සනින් ප්‍රවෘත්ති දෙපාර්තමේන්තුවෙන් නිකුත් කරනු ලැබූ හැඳුනුම්පතත් අදාළ නිලධාරීන් වෙත ඉදිරිපත් කරනු ලැබුවත් ඔවුහු ඒවා පිළිබඳ කිසිදු සැලකිල්ලක් දක්වා නැත.
 
මෙම අවස්ථා දෙකේ දීම සිවිල් ආරක්‍ෂක කමිටු පිරිස් මාධ්‍යවේදීන්ගේ කටයුතු වලට බාධා කරනු ලැබ තිබේ.  මාධ්‍යවේදීන් තම කටයුතු ඉටුකරන්නේ මෙරට ජනතාවගේ තොරතුරු දැනගැනීමේ අයිතිය ක්‍රියාවට නඟනු සඳහාය. ඒ සඳහා ක්‍රියා කිරීමේ දී මාධ්‍යවේදීන් වෙත ලැබෙන අයිතිවාසිකම් රාශියක් ද තිබේ. එම අයිතිවාසිකම් ආරක්‍ෂා කර දීම පොලිස් දෙපාර්තමේන්තුවෙන් අපේක්‍ෂිත මූලික කාර්යයකි. එහෙත්, පොලිස් දෙපාර්තමේන්තුවේ නිලධාරීන් සහ එයට අනුයුක්තව කටයුතු කරන සිවිල් ආරක්‍ෂක සේවයෙහි නියුක්ත වූ පුද්ගලයන් හට මෙම අයිතිවාසිකම් පිළිබඳව හෝ තම රාජකාරි පිළිබඳව හෝ මාධ්‍යවේදීන් සම්බන්ධයෙන් අනුගමනය කළ යුතු පිළිවෙත් පිළිබඳව හෝ ප්‍රමාණවත් අවබෝධයක් තවමත් ලබා දී නැති බව ඉහත සිද්ධි දෙකෙන් මනාව පැහැදිලි වේ. එහෙයින් අප ඔබගෙන් ඉතා ඕනෑ කමින් ඉල්ලා සිටින්නේ එම පිරිස් වෙත එම අවබෝධය ලබා දීමට ඉක්මන් පියවර ගන්නා ලෙසයි.
 
පසුගිය මස එනම්, ජනවාරි 9 වනදා මන්නාරමේ දී මාධ්‍යවේදී ජෝෂප් විලියම් එස් ප්‍රනාන්දු මහතා මෙවැනිම වාර්තාකරණයක යෙදී සිටියදී පොලිසියේ සහ නාවික හමුදාවේ නිලධාරීන් විසින් බැන වැදී එළවා දැමීම ගැන මන්නාරම මහේස්ත්‍රාත් අධිකරණය වෙත යොමු කර තිබූ පැමිණිල්ලක් සම්බන්ධයෙන් තීන්දුවක් දෙමින් මහේස්ත්‍රාත් වරයා ප්‍රකාශ කර තිබුණේ මාධ්‍යවේදීන් හට නිදහසේ තම කටයුතු කරගෙන යාමට අයිතියක් ඇති බවත්, ඔවුනගේ කටයුතු වලට බාධා කිරීම අදහස් ප්‍රකාශ කිරීමේ නිදහස උල්ලංඝනය කරන්නක් බවත්ය. මාධ්‍යවේදීන්ගේ කටයුතු අත්හිටුවීම හෝ සීමා කිරීම සඳහා ක්‍රියා කළ හැක්කේ අධිකරණයට පමණක් බව මහේස්ත්‍රාත්වරයා එහි දී වැඩිදුරටත් ප්‍රකාශ කර තිබේ.
 
එහෙයින් මේ කරුණු ඔබේ අවධානයට යොමු කරමින් මාධ්‍යවේදීන් හට නිදහසේ තම කටයුතු කරගෙන යාමට අවශ්‍ය වාතාවරණය සැලසෙන පරිදි ඔබ යටතේ සේවය කරන නිලධාරීන්හට සෘජු සහ පැහැදිලි උපදෙස් ලබා දෙන ලෙස නැවත වරක් ඉල්ලා සිටිමු.
 
ස්තුතියි.
 
සනත් බාලසූරිය, – 0773112505
සුනන්ද දේශප්‍රිය – 0777312457
 
සනත් බාලසූරිය – සුනන්ද දේශප්‍රිය – ධර්මසිරි ලංකාපේලි – එන්.එම් අමින්  ආර්. භාරතී
 
 
 
 
 
 
 
 
 
 
 
 
                                                                                                                                                                                                                                                                                                 

%d bloggers like this: