”මාගේ තොරතුරු සෙවීමට රහස් පොලිස් කණ්ඩායමක් යෙදවීම’ ගැන මාධ්‍යවේදී අමරතුංග පොලිස්පතිට ලියයි

ලංකාදීප ජ්‍යෙෂ්ඨ මාධ්‍යවේදී සී.ජේ. අමරතුංග මහතාගේ උපන්ගම වන අනුරාධපුර වන්නියන්කුළමට පසුගිය දිනක පොලිස් නිලධාරීන් පිරිසක් රහසිගත ලෙස ඔහුගේ තොරතුරු සෙවු බවට මාධ්‍ය වාර්තා පළවිය. ඒ පිළිබදව තම මතය ප්‍රකාශ කරමින් සහ පොලීසියේ මෙම සැක සහිත ක්‍රියාව පිළිබදව  විරෝධය පළ කරමින් මාධ්‍යෙව්දී අමරතුංග මහතා පොලිස්පති වරයාට ලිපියක් යවා ඇත.

”ජනමාධ්‍ය වේදියෙකු වන මාගේ තොරතුරු සෙවීමට රහස් පොලිස් කණ්ඩායමක් යෙදවීම” යන ශීර්ෂයෙන් යුතු එම ලිපියේ වැඩිදුරටත් මෙසේ මෙසේ සදහන්වේ .

” ජනමාධ්‍ය වේදියෙකු ලෙස දිගුකලක් වෘත්තීය කටයුතු වල නියැලෙන මම මේ වන විට ඉරිදා ලංකාදීප පුවත්පතේ ප‍්‍රාදේශිය ප‍්‍රවෘත්ති කර්තෘ ලෙස සේවය කරමි. ඒ අතර දේශපාලන, සමාජ, ආර්ථික කරුණු පිලිබඳව ලිපි සැපයීමෙහිද යෙදෙමි. දිනපතා ලංකාදීප පුවත්පතේ බ‍්‍රහස්පතින්දා පළවන ”ගුරුදා විග‍්‍රහය” විවේචනාත්මක ලිපිය ලිවීමේ වගකීමද මෑතක සිට මා වෙත පැවරී ඇත. ඒ සියල්ල මා කරන්නේ වෘත්තීය ආචාර ධර්ම වලට හා රටේ ජාතික නීතියට අනුකුලව අප සතු ප‍්‍රජාතන්තී‍්‍රය අයිතිය භාවිතා කරමින්ය.

එසේ තිබියදී රහස් පොලීසියෙන් හඳුනාගත් පිරිසක් පසුගිය දිනක අනුරාධපුරයේ අපගේ නිවස අවට පදිංචි කරුවන් හමුවී මා ගමේ සිටි කාලයේ කළ දේශපාලනය පිළීබඳව තොරතුරු ලබා ගැනීමටය උත්සහ දරා ඇත. මගේ පවුලේ අන් අයගේ තොරතුරු ග‍්‍රාමනිළධාරී මහතාගෙන් ලබාගත් බවද ඔවුන් පවසා තිබේ. අංක 247 වන්නියන්කුලම වත්මන් ග‍්‍රාම නිළධාරී එච්.එම්.එස්. සිරිවර්ධන මහතා එම තනතුරට පත්වූයේ මා ගමෙන් පිටවී කලකට පසුව නිසා මා පිළිබඳ තොරතුරු දීමට ඒ මහතාට නොහැකිවීම නිසා මෙලෙස අසල්වාසීන්ගෙන් තොරතුරු විමසන බවටද ප‍්‍රකාශ වු බව කියති. මේ නිළධාරීන් කිසිවෙකු මගේ නිවසට පැමිණ හෝ ඥාතීන් හමුවී නොමැත.

වසර තිස්පහකට පෙර ගමෙන් පිට වූ මගේ එකල දේශපාලනය පිළිබඳ තොරතුරු මෙලෙස රහසේ සොයා බැලීම මට ප‍්‍රශ්නයකි. ඒ පිළීබඳව ඉරිදා ලංකාදීපය කළ සොයාලැබීමකදී දැනගන්නට ලැබී තිබෙන්නේ ” මා තානාපති සේවයක තනතුරකට යන නිසා මගේ පසුබිම සොයා එවන ලෙස කොළඹින් ලැබුණු නියෝගයක් මත ”බුද්ධි අංශ” නිළධාරීන් පිරිසක් මා පිළිබඳව රහසිගත විමසීමක් කර ඇති බවයි. එසේ වූවද කිසිදු තානාපති සේවා නිලයකට අයදුම් පතක් හෝ මා ඉදිරිපත් කොට නොමැත. එබැවින් මෙය සැකයට තුඩු දෙන තත්වයකි.

මෙම කරුණු පිළිබඳව පොලිස් මාධ්‍ය ප‍්‍රකාශක මහතා ප‍්‍රකාශ කොට ඇත්තේ පොලිස් සේවයට බැඳීමට ලැබුණු ඉල්ලූම් පතක ඔහු හෝ ඇය ගැන කරුණු විමසිය හැකි තැනැත්තෙකු ලෙස මගේ නම සඳහන් වන නිසා සොයා බැලීමක් කළ බවයි. මෙයද මට පිළිගත නොහැකිය. කිසිවෙකු එලෙස මගේ නම යොදන බවක් මට දන්වා නොමැත. මා දන්නා කිසිවෙකු පොලීසියට ඉල්ලූම් පතක් ඉදිරිපත් කොට නැත. එමෙන්ම මීට වසර 34කට පෙර ගමෙන් පිට වූ මා දන්නා කිසිවෙකු පොලීසියට ඉල්ලූම් කරන වයසේ නොවන බවද පැහැදිලිය.

අනෙක් අතට රහසේ පොලීසිය සොයා බලා තිබෙන්නේ පොලීසියට අයදුම් කළ අය ගැන තොරතුරු විමසීමක් නොවේ. මා ගමේ සිටියදී කළ දේශපාලනය ගැන විමසීමකි.

එබැවින් මෙම පරස්පර විරෝධී හේතු දැක්වීම මට පිළිගත නොහැකිය. ඒ පිළිබඳව සැබෑ සිදුවීම සොයා බලා හෙලිදරව් කරන මෙන් මම ඔබතුමාගෙන් ඉල්ලා සිටිමි.

මගේ පිළිගැනීම නම් මගේ ජනමාධ්‍ය කටයුතු නිසා රජයේ කිසියම් පිරිසක් පොලීසිය යොදාගෙන කුමන හෝ ආකාරයක වැඩ පිළිවෙළක් මට එරෙහිව කි‍්‍රයාත්මක කිරීමට උත්සහ දරණ බවයි. මගේ අදහස නම් මෙය පොලීසිය දේශපාලනකරණය වීමකි. එමෙන්ම මහජනයාගේ ආරක්ෂාව සැපයිය යුතු පොලීසියම භීතිය වැපිරවීමේ කටයුත්තකට සියුම් ලෙස යොදා ගැනීමකි. මා කල්පනා කරන්නේ මෙය අවාසනාවන්ත තත්වයක් බවයි.

මගේ පියාද පොලීසියේ සේවය කළ අයෙකි. පොලීසියේ තිබිය යුතු අපක්ෂපාතී බව, සෘජුබව හා දේශපාලකයන්ට ගැති නොවීම ආදී ගුණාංග පිළිබඳව මා ඉගෙනගත්තේ පොලිස් භටයෙකු වූ මගේ පියාගෙනි. සිදුවන ඕනෑම දෙයකට කොන්ද කෙලින් තබාගෙන මුහුණ දීමට මා ඉගෙනගත්තේද පියාගෙනි.

1987 අපේ‍්‍රල් මස 22 දා කන්කසන්තුරේ දී මගේ ලොකු මල්ලී මියගියේ පොලිස් සේවයේ යෙදී සිටියදීය. ඒ කන්කසන්තුරේ පොලීසියට එදා එල්ල වූ ප‍්‍රහාරයේදීය. ඊට පෙර වසරේ දිනෙක මාදම්පේ පොලිස් පුහුණු කඳවුරකට මල්ලී කැටුවගොස් පොලිස් සේවයට භාරකරන ලද්දේ මා විසිනි. පසුගිය මාසයේ අනුරාධපුරයට ගිය මා මල්ලීගේ සොහොන වෙත ගොස් එය පිරිසිදු කොට ගෞරව දැක්වූයෙමි. ඒ මල්ලී මියගොස් විසිපස් වසරක් ගතවූ බව මට සිහිපත් වූ හෙයිනි. මගේම සැලසුමකට අනුව මා විසින්ම ඉඳිකරවන ලද මල්ලීගේ ස්මාරකය තවමත් ඉතා හොඳින් ආරක්ෂා වී තිබීම ගැන මම සතුටු වූයෙමි.

එබැවින් පොලිස් සේවය පිළීබඳව මා තුළ තිබෙන්නේ කුඩා කල පටන් ඇතිවූ ගෞරවනීය හැ’ගීමකි. එම හැ’ගීම දිගමට පවත්වාගෙන යාමට මට අවශ්‍යය. පොලීසිය දේශපාලනීකරණය වීමෙන්, කාගේ හෝ අතකොළු බවට පත්වීමත් ගෞරවය විනාශ කරගන්නේ නම් එය අභාග්‍යයකි. මගේ පියා පොලීසියේ සේවය කළ බව කීමට මට ලජ්ජා හිතෙන තත්වයක් නිර්මාණය වනවාට මම කැමති නොවෙමි. මගේ මල්ලී ගැන තිබෙන සංවේදී මතකයට හානි වනවාට මම කැමති නොවෙමි.

එබැවින් මම ඔබගෙන් ආරක්ෂාව නොඉල්ලමි. මගේ පියා මට කියාතිබෙන්නේ මහජනයාගේ ආරක්ෂාව සැපයීම පොලිස් සේවයේ වගකීම බවයි. මම ඔබතුමාගෙන් ගෞරවයෙන් ඉල්ලා සිටින්නේ පොලිස් සේවයේ තිබිය යුතු ගෞරවනීය තත්වය ආරක්ෂා කරන ලෙසයි.

මා පිළිබඳව රහසේ තොරතුරු සෙවීමට රහස් පොලීසිය හෝ බුද්ධි අංශ හෝ යෙදවීමට කිසිඳු අවශ්‍යතාවයක් පැන නොනගින බව ඔබතුමාට ගෞරවයෙන් දන්වා සිටීමට කැමැත්තෙමි. ඔබට අවශ්‍ය ඕනෑම තොරතුරක් සාක්ෂි සහිතව ඉදිරිපත් කිරීමට මම සූදානමින් සිටිමි.

එබැවින් මා ඔබගෙන් ඉල්ලා සිටින්නේ මා පිළිබඳව පොලීසියේ කුමන හෝ අංශයක් කළ රහසිගත පරීක්ෂණය කුමක්දැයි සොයා බලා නිවැරදි කරුණු මා වෙත දැනුම් දෙන ලෙසයි. එය මාගේ ජනමාධ්‍ය කටයුතු නිසා සිදුවූවක්නම් මම එයට මාගේ විරෝධය මෙයින් පළ කරමි.”

 

%d bloggers like this: